बुधबार, चैत २०, २०८१

काठमाडौं । तीन दशक लामो इतिहास भएको हस्पिटल फर एडभान्स मेडिसिन एन्ड सर्जरी (ह्याम्स) लिमिटेडले तीन अर्ब रुपैयाँ लगानी गरेर भक्तपुरको मध्यपुर थिमिस्थित गठ्ठाघरमा हेलिप्याडसहितको दोस्रो ह्याम्स अस्पताल बनाउन लागेको छ । राजधानीको मण्डिखाटारमा रहेको ह्याम्समा हेलिप्याडको सुविधा छ । बाँकी ५० करोड रुपैयाँ ह्याम्सको क्षमता विस्तारमा लगानी गर्ने भएको छ ।

दोस्रो अस्पताल आउँदो दुई वर्षमा सक्ने ह्याम्सका अध्यक्ष रामशरण भण्डारीले बताए । “ह्याम्स अस्पतालको रूपमा विकास गरेर आउँदो दुई वर्षमा दोस्रो ह्याम्स सञ्चालनमा आउने छ” उनले भने ।

उनले पहिलो र दोस्रो चरणमा १००–१०० बेड थप्ने जानकारी दिए । बैंकबाट एक अर्ब ४० करोड लिने र सेयरधनीबाट थप ६० करोड रुपैयाँ स्वपुँजी (इक्विटी) लगानी गर्ने योजना छ ।

आवश्यकताअनुसार अस्पतालको सेवा विस्तार गर्दै जाने योजना रहेको अध्यक्ष भण्डारीले सुनाए । अस्पताल बनाउन जग्गा खरिद भइसकेको छ । भवनको नक्साको स्वीकृतिको प्रक्रियामा छ ।

ह्याम्सले दोस्रो अस्पताल निर्माणका साथै गठ्ठाघरमा सञ्चालनमा रहेको नागरिक कम्युनिटी टिचिङ हस्पिलको स्वामित्व खरिद गरिसकेको छ । चलिरहेको अस्पतालको सेवा सुधार गर्न र उपकरण खरिदमा २० करोड बढी लगानी भइसकेको छ । ह्याम्सले नागरिक कम्युनिटी अस्पताल १० करोड रुपैयाँमा खरिद गरेको हो । नागरिक अस्पतालको कुल २२ लाख ७३ हजार कित्ता सेयरमध्ये ह्याम्सले ९ लाख ९१ हजार कित्ता खरिद गरेको थियो ।

ह्याम्सले नागरिक कम्युनिटीको स्वामित्व खरिद गरेर सँगै ट्रमा सेवासहितको नयाँ मल्टिस्पेस्यालिटी सेवा दिने भएको छ । ह्याम्सले ६ महिनाअघि नागरिकको अस्पताल ‘टेकअभर’ गरेको हो । निजी अस्पतालहरू आर्थिक संकटले थला पर्दै गएका बेला ह्याम्सले नागरिक कम्युनिटी टिचिङ हस्पिटलमा स्वामित्व खरिद गरेको थियो ।

ह्याम्सका अध्यक्ष भण्डारी नेतृत्वमा ह्याम्स सञ्चालन गर्ने समूहले स्वामित्व खरिद गरेपछि हाल सञ्चालनमा रहेको नागरिक कम्युनिटी अस्पतालको सेवा विस्तार भइरहेको छ । नागरिक हस्पिटलमा ट्रमालक्षित बिरामीलाई प्राथमिकतामा राख्दै गुणस्तरीय सेवा दिने योजना छ ।

पूर्वको राजमार्गमा दिनँहु सडक दुर्घटना भइरहेका हुन्छन् । भक्तपुरमा सुविधा सम्पन्न अस्पताल छैन । दोस्रो ह्याम्स बनेपछि नागरिकलाई समाहित गर्ने योजना छ ।

नागरिकसँग हाल एकसय शैय्याको अस्पतालसँगै १२ रोपनी जग्गा र तीनतलाको नागरिक कलेज अफ हेल्थ साइन्सको सम्पत्ति छ । त्यहाँ बीएन, बीएससी नर्सिङ र एचएका शैक्षिक कार्यक्रम सञ्चालन भइरहेको छ ।

१७ वर्षअघि नागरिक कम्युनिटी टिचिङ हस्पिटल सुरुआत मुनाल क्लिनिकबाट भएको हो ।

सरकारले हालसम्म तीन सयभन्दा बढी सुविधासम्पन्न अस्पताल सञ्चालनका लागि निजी क्षेत्रलाई स्वीकृति दिएको छ । यस्तै, डेढ दर्जन बढी मेडिकल कलेज सञ्चालनमा छन् ।

पछिल्लोसमय अस्पतालमा निजी लगानी बढेको बताउँदै अध्यक्ष भण्डारीले भने “प्रतिस्पर्धाले गुणस्तर र सेवा सस्तो हुने हो । डाक्टरको म्यापिङ गर्दा नेपालमा अस्पतालको संख्या कम छ ।”

अध्यक्ष भण्डारीले नेपालमा सबै रोगको उपचार सम्भव भए पनि विदेश जानेको संख्या धेरै रहेको बताउँछन् । कर्पोरेट हस्पिटलको हिसाबले ५० प्रतिशत विदेश जानेलाई रोक्न सके पुग्छ । राम्रो अस्पताल आउनु भनेको विदेश जानेलाई राम्रो रहेको उनको भनाइ छ ।

५० करोड लगानी थपेर क्षमता बढाउँदै
हाल ह्याम्सको क्षमता विस्तारको काम सुरु भएको छ । नयाँ भवन बनाएर ५० बेड थप्ने भएको हो । भवन एक वर्षभित्र बनाएर सञ्चालनमा ल्याउने तयारी ह्याम्सको छ । कुल लगानीमा ३० करोड भवन बनाउन र बाँकी २० करोड रुपैयाँ उपकरण खरिदमा खर्च हुने उनले जानकारी दिए । आवश्यकताअनुसार लगानी बढाउँदै जाने उनको भनाइ छ ।

प्रिमियम मूल्यमा आईपीओ ल्याउँदै
नयाँ अस्पतालमा लगानी जुटाउन ह्याम्सले प्रिमियम मूल्यमा साधारण सेयर (आईपीओ) निष्कासन गर्ने भएको छ । ह्याम्सले प्रतिकित्ता २८८ रुपैयाँमा ११ लाख २५ हजार कित्ता आईपीओ निष्कासन गर्न लागेको हो ।

प्रिमियम मूल्यमा आईपीओ ल्याएर ३२ करोड ४० लाख रुपैयाँ लगानी जुटाउने योजना रहेको छ । आईपीओ निष्कासन गर्न नेपाल धितोपत्र बोर्डमा प्रस्ताव पेस गरेको १५ महिना भइसकेको छ । हालसम्म बोर्डले आईपीओ निष्कासनका लागि अनुमति दिएको छैन । ह्याम्सले २०८० पुस २६ गते आईपीओ निष्कासन गर्न बोर्डमा आवेदन दिएको थियो । आईपीओ निष्कासन तथा बिक्री प्रवन्धकमा मुक्तिनाथ क्यापिटल लिमिटेड रहेको छ । आईपीओ निष्कासन गर्ने ह्याम्स नेपालको पहिलो अस्पताल हो ।