पोखरा । गण्डकी प्रदेशमा घरेलु मदिरा उत्पादन र नियमन गर्ने विधेयक संसदीय समितिबाट प्रदेश सभामा संशोधनसहित फिर्ता भएको छ ।

संसद्को अर्थ तथा विकास समितिमा दफावार छलफल गरेपछि उक्त विधेयक संशोधन सहित सभामा पेस गरिएको हो । समितिका सभापति भोजराज अर्यालले सोमबारको बैठकमा विधेयक पेस गरेका हुन् ।

उक्त विधेयक मंगलबार बस्ने संसद् बैठकबाट पारित गर्ने तयारी छ । समिति सभापति अर्यालले सरोकारवाला पक्षसँग गहन छलफल पछि सभामा विधेयकको प्रतिवेदन पेस गरिएको बताए ।

छलफलका क्रममा गण्डकी विश्वविद्यालयका उपकुलपति, विषय विज्ञ र सरोकारवालाहरूसँग समेत रायसुझाव लिइएको उनले बताए ।समितिको छलफलपछि विधेयकमा घरेलु मदिरा उत्पादनमा प्रयोग हुने ‘मर्चा’ लाई स्पष्ट रूपमा परिभाषित गरिएको छ ।

उत्पादन तथा नियमनसम्बन्धी केही बुँदाहरू थप गरिएको छ । विधेयकमाथि सांसदहरू कुसुम बुढा पुन र गणेशमान गुरुङले संशोधन प्रस्ताव दर्ता गराएका थिए ।

यस्तै सामाजिक विकास तथा कृषि समितिले ‘अपाङ्गता भएका व्यक्तिको अधिकार सम्बन्धमा व्यवस्था गर्न बनेको विधेयक’ माथिको प्रतिवेदन पनि प्रस्तुत गरेको छ । सरोकारवालाको सुझाव सहितको प्रतिवेदन समिति सभापति दमयन्ती रुचालले सभामा पेस गरेकी हुन् ।

उक्त विधेयकमा सांसद सुनिता थापाले संशोधन प्रस्ताव दर्ता गरेकी थिइन् । थापाको संशोधन प्रस्तावलाई समेत समेटेर समितिले सर्वसम्मत रूपमा प्रतिवेदन तयार पारेको रुचालले बताइन् ।